Genetik baxımdan sağlam nəslə sahib olmaq, əslində, hər dövlət üçün böyük uğurdur. Bu baxımdan genetik müayinələrin əsas məqsədi sağlam nəsil yetişdirməkdir. Prenatal diaqnostika isə əsasən döldəki irsi xəstəliklərin və inkişaf qüsurlarının müəyyən olunmasına istiqamətlənmiş tibbi prosesdir. Prenatal sitogenetik diaqnostika, doğuşdan əvvəl ana bətnindəki dölün nümunələrində xromosom səviyyəsində araşdırmanın aparılmasıdır(1). Prenatal sitogenetik diaqnostika spontan abortlar və bətndaxili inkişaf ləngimələrinin proqnozlaşdırılmasına, xromosom xəstəliklərinin və onların ağir fəsadlarının yayılması səviyyəsinin azaldılmasına imkan verir.